من أنا

صورتي
Giza, Egypt
بفكر واقصّـر في التفكير فارجع أكفر عن تقصيري وأفكر ..أكتر ولما أتعب م التفكير ..بحاول اكتب كلها محاولات.. وأنت بس اللي ممكن تقولي انا قد ايه قربت منك؟ -قد ايه نجحت؟- أو قد ايه بعدت؟.. -قد ايه فشلت؟- بس الحاجه اللي نفـسي اكتبها اوي اوي..لسه فكرتها مجتليش..ولو جت ..هادور على غيرها لانها اكيد مش هاتبقى هيّ
يتم التشغيل بواسطة Blogger.

في أديرة الـغَرق

في أديرة الـغَرق




وحشـتينـي..
مش هاكدب وقول استـنـيتـكِ...
أنـا عـمري ما استـنيت
مش فقدان أمـل...
قبل الفَـقـد .. لازم الأول وجـود
ومكنش الأمل لسة انوجـد
ولا كنـش "آدم"  انـولـد
مش فلسـفه...
بس البشـر...مخـاضـات في أرحام الأمـل
ومكنش الأمـل لسه انـوجـد

م تـقبلناش قبل كدا
غير ربمـا صدفه في الغيب القديم
ملمحتكيش\مشفتكيش\مرسمتـكيش قبل كـدا
ولا حتى شفتــنـا في الحـلم
 ولا خفت أفسـره يُقع من على جنـاح الطـيور 
أنـا اصـلا مبحـلمشِ

بس أنـا عـارفـك

مـتخـافيـش...
أنـا مش كـاهن فـرعـوني...
ولا هقـدمـك قـربـان لـ " آتـون" العظيمـه تحرقـك
ولا هي حتـى هتـقبـلـك...
ولا نصف إلـه إغريقـي..هلعنـك
ولا هـارفـضـك
أنـا آدم...
أنا كتابات الملايكة على ورقات القـدر...
 قـريتـيـها ؟ ...
أنـا وسـوسـات الشيـاطـين...
اللي استعذتي منهم ...
وصـرفتهـم عـنك...
إوعي تكـوني صـرفتيني معاهم؟

متسئلينيش ازاي عـرفـتـك؟...
انا اكتر واحد بيحب الاسئله...
انا فِطرة وشهـوة وسؤال...
بس انتي حالة بتختلف..
انتي الاجـابة مقـدمـا

هو انـا ازاي شايفك كـدا؟؟
يعني الشـوارع..
الجـسـر...
عمود النور اللي عمره مانور قبل ماتيجي..
شايفينك زي مانا شايفك كدا ...
الراجل العجوزبتـاع الجـرايـد اللي كل شوية يقولي هـا... حبيت؟
واقوله لسـه...
 شايفك كدا؟؟
طب و النيل...
النيل اللي قربوله الف عروسة نيل بِـكر ..
اجمل بنـات فرعون... في العصر الخصيب...
شايفك كدا ؟؟...

وحـشتـيني...
متاخـديش كـلامي من ع السـطح
بنات كتيره اوي حـلويين من ع السطح مشفتـهمـش
لكن اغـرقي ..
اغرقي وغرقيني معاكي في المعنى الغـويطً
المعاني كنـوز...
والكـنز مش للـكل..
الكنـز مش ع السطـح
الكنز لازم يتـفقـد..ويترهـبن في أديرة الـغرق

انا عارف ان العُمق مخيف...
وضلمة
ولو اخرج يـده لم يكـد يراهـا
بس انا شايفك ...
و اشمعـنى يونس..
يونس شاف في بطن الحوت في بطن محيط
مش يمكن كلنا يونس في لحظه م اللحظات
واللحـظه دي انا يونس...
وانتـي شجـرة اليقطين...
ظلليني بقى
بس متضللينيش...
ولا عشـان يونس نبي و أنـا مش نـبي؟؟ ...

مترديش...
م بسئلكيـش...
مش عـايز اجـازف واسمـعـك...
بنات كتير .. اتكـلمـت .. ماتت ..
متمـوتيش...

مكنتـش اعرف ان الفرح ممكن يكون مؤلم كـدا...
و ان الألم مفـرح كـدا...
و ان البُكـا شهوة كـدا...
كنت عـارف ان الرجولة تكتمل مُـتـفـرده... في الصورة
ومكنـتـش أعـرف إنـها في الحقيقة ...م تكتملش بغيرالـبُـكـا
يـا أحـلى معنـى للـبُكـا...

دلوقتي بقـا : ...
تكملي الفراغات...
وتحلي هندسة الـلقـا...
وتقري الفاتحه على طلاسمي
وتبطلي مفعول السـحر
واحتفظ بيكي..وافقد المعنى...
وساعتها مش هاملك  غير اني اقرا " عبس... وتولى"...؟؟!!

ولا...
ارحـل و تـرحـلي...
واسيب خيالي يكملك و تكـملي
واحتفظ بالمعنى...
بالوجع...
الوجع الوحـيـد اللي امتـلك معنى ...
واكتفي بلحظه عيشتها
وهاعيشها كل ما هاحيها من تاني...؟!!
مش بردو ممكن نعيش 60 سنه... او 100سنه...
علشان نقابل ربنا ونقول يارب عشنا لحظه؟!!...

مش عارف...
بس عـارفه ... أنـا مش هجـازف


2 التعليقات:

غير معرف يقول...

جميله أوي تسلم إيدك
بس مابين الفقرات قوه وضعف
فقرة قوية تخجل منها فقره أخري لقوتها
ياريت ماتخليش حد خجلان أنت تقدر تخلي كله قوه
بحر خيالك بجد

إســلام حـجـي يقول...

شكرا على تعقيبك
هي فقط محاولة لترك الامواج تعلو وتهبط كيف واين شاءت

لكن شكرا جزيلا ويؤخذ طبعا في الاعتبار
:)

إرسال تعليق

المتابعون