من أنا

صورتي
Giza, Egypt
بفكر واقصّـر في التفكير فارجع أكفر عن تقصيري وأفكر ..أكتر ولما أتعب م التفكير ..بحاول اكتب كلها محاولات.. وأنت بس اللي ممكن تقولي انا قد ايه قربت منك؟ -قد ايه نجحت؟- أو قد ايه بعدت؟.. -قد ايه فشلت؟- بس الحاجه اللي نفـسي اكتبها اوي اوي..لسه فكرتها مجتليش..ولو جت ..هادور على غيرها لانها اكيد مش هاتبقى هيّ
يتم التشغيل بواسطة Blogger.

قِبـله بتـستـقبل القِـبـله

قِبـله بتـستـقبل القِـبـله


فـاكـره...هَزّة إيـدينـا وإحـنـا بنـعدي الطـريق
كـان كـل شيء بيـبارك النـشوه البريئه و يبـارك الطفل البـريء
جغـرافيـا الـزمن
تـأشيـرة الـشجـن
حتى الرصيـف...
حتى الرصيـف كان تحت أقـدامنـا ...بيصلي للعشق العفـيف
ورغم البَـشـر
عمـري مـاخُـفـت م الـزحـام
كـنّا بنـلون وشـوشهم ونغلـب كـآبة الـسهر
ونوزع ابتـسـامـات على شُهـدا التـعـاسه المـطلقه
ونقول ياعيـني... سـابوا نفسهم للمـطر

فـاكره سـاعتهـا شَأدِة إيديـكي على إيـدي
وخَط العمر في كفـوفك يـصب العمـر في كـفوفي
وقـاموسي..
م بيعـرفش معنى لــ ..خوفك ولا خـوفي

فـاكره سـذاجـتي
وتصديـقـك
وتشجـيعك وتصقـيفك
بقول: ..يـاأحـلامي لا تكـلي
عشـان اخـدك مع أكـلي
وأصبك قوه في قزازتي
واروح بيـكي لمدرستي عندي حصـتين في الـ
العشق
وحصتـين في الـ...فرح
وحصتين ممـارسة لرذيلة الضحـك بـصوت عـالي
وعمري م اتكتب غائب
واسمي كان حضور دائم في خانة الـلي بيـ شـاغب

فاكرة رقصة الشـارع و أنـا راجع
وفاتح ليكي دراعاتي
وباقلع درعي عن ذاتي
وبارميلك بقايايا تلملميـها من تـاني
مع قميصي ابو زرار مقطوع
وطبعة كوره على صدره
وشنطه تقيله على ضهره
ماليها بكتبه ومقلمته وباقي الفكة م المصـروف
بقولك جبت كيس شيبـسي
وخدنا في حصة التعبير ...كيف تغـير الموضوع

فاكره...جوعي إليكِ سـاعة الغـدا منـك
و انـا بـاكل وبقـتل كل الشر في العالم مع الكـرتـون
مع روبن هود
وسلاحـف النـينجـا
واحـلي بعد الأكل بالـمـانجا
وألـغوص نفسي من قربك
م انـا سـامحـيني ...
انا معرفش اكونـلك من غير ما اطهر بقايا الشيطان فيكِ
واطوف حواليكِ سبع اشـواط
واقبل حَجـرك الأسـود واصلي صلاة الحـلم في حِجـرك
بدون إحـرامِ

فاكره عصفـوري الأخضـر في بلـكونتـك
وانا بفطرتي السـمرا
وشعري الرافض تفض بكارته غير ايدين صمتك
فتحـتله قفـصه
ومهربــش
ضِحكت عليه ولومـتلـه حـظه
لكن انتي ....مضحكتيش
وبتكافئيه على حرصه
تصبي العشق في الميّـه
وزيدتي حُبك على عصفه وعلى حَبـه
ساعتهـا غِيرت انـا منـه
ياريتني كنت انا العصفور

صباح النور
صباح الفَجـر والصلا حـاضر
وقِبله بتستقبل القِبـله
وبتسبح بطيب خـاطر
ودافعه الجزيه للنهـار يطلع
عشان لما اصحى...
يستقبلني في صالة كِبار زوار
ويرضـخـلي ولا يـكـابر
وميجمركش ...
شريط فيديو حـياه مـاضيـه
وحلم الحـياه الجـايه
وشهوة ...يلا عـايز اكبر
لكـن
مكنتش اعرف إنـه من عـمرك
مكنتش اعرف إن سُنـتي فَـرضـك
ولا اعرف إن جـنسيـتي قـدرك

مكنـتش اعرف إن تكويني وبـلالـيني
الحمرا والبيضا والسمرا وضي الشمعه في الحـفله
هيـاخـدك مني على غفـله
ويـاخد الايمـان بالذات
ويهدم صنمي في الكعـبه
ويقفل عَشرة الضُمَــنا وينهي بلعبته الـلعـبه
ويـاكل النمل عـكـازي
وينـخر الحنين ضهري
ويقفل صفحتي فـ قـدرك
...ويفتح
مزاد صـبري

مكنتش اعرف

2 التعليقات:

غير معرف يقول...

amazing

غير معرف يقول...

sam sunshine

إرسال تعليق

المتابعون